Heinz: «Gsesch det äne d‘Monte Rosa?»

Armin: «Hä?»

Heinz:  «Gsesch de Monte Rosa?»

Armin: «Welli Rosa?»

Heinz:  «Monte Rosa!.»

Armin: «Aha, ...wo meinsch genau?“ 

Heinz:  «Wänn d‘Hand über de säb Tannewipfel usstrecksch...»

Armin: «Jetzt?» 

Heinz: «...und dänn zwoi Finger nach links, det isch Monte Rosa.»

Armin: «Welli Finger meinsch, de Dume und de Zeigfinger?»

Heinz:  «Nei, dä Zeigfinger und dä Mittelfinger!»

Armin: «Aha, und wo häbsch die jetzt genau ane?»

Heinz:  «Gsesch de Chileturm? Und links häts en Tanne.»

Armin: «Ahä, Ich gse ööpe drü Tanne.»

Heinz:  «Nei, das sind Lärche!»

Armin: «Was Lärche, vorher häsch doch gseit Tanne, 

jetzt sind uf eimal Vögel?»

Heinz:  «Nei nöd Lerche, Lä-ä-ä-rche.»...

Armin: «Aha, Lärche. Und wo flüüged die jetzt ane?»

Heinz:  «Wer? Tanne?»

Armin: «Nei, d‘Lärche.»

Heinz:  «Tanne chönd nöd flügge, Lärche au nöd.»

Armin: «Aha ... uii, wo isch jetzt Rosa higfloge?» 

Es ist langsam dunkel geworden. 

Armin: «Ich glaub, jetzt händs sLicht abglöscht.» 

Heinz:  «Löli, d‘Sunne isch abe...»

Armin: «Mmmh... chum mer lueged morn na einisch!»